Policia e Shtetit ka reaguar zyrtarisht lidhur me videon e publikuar në rrjetet sociale ku një punonjës policie ka shkelur rëndë etikën. Bëhet fjalë për videon ku shihet që polici “ledhaton” një vajzë nga mjeti i policisë.
Policia thotë se ka nisur menjëherë hetimi disiplinor për efektivin, i cili është punonjës i patrullës së përgjithshme të Komisariatit nr.3.
Lexo edhe- VIDEO/ Polici me uniformë prek vajzën nga të pasmet në mes të rrugës
NJOFTIMI I PLOTE
policia e Shtetit
Pas publikimit të një videoje në rrjetet sociale, ku shfaqet një punonjës policie që ka shkelur rëndë Kodin e Etikës dhe Rregulloren e Policisë së Shtetit, duke cenuar imazhin e Policisë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit dhe Drejtorinë Vendore të Policisë Tiranë për të filluar menjëherë hetimin disiplinor.
Drejtoria e Standardeve Profesionale dhe DVP Tiranë, pas verifikimeve të kryera dhe hetimit të bërë, identifikuan punonjësin e Policisë, i cili është shtetasi M. K, punonjës i Patrullës së Përgjithshme të Komisariatit të Policisë Nr. 3.
Për këtë punonjës u bë pezullimi nga detyra dhe u mor masa e përjashtimit nga Policia e Shtetit, për shkelje të rëndë të Rregullores së Policisë së Shtetit.
Policia e Shtetit dënon ashpër veprime të tilla që cenojnë imazhin e Policisë tek qytetarët dhe fton cilindo që të denoncojë çdo rast të cenimit të figurës së punonjësve të Policisë apo të abuzimit me detyrën, duke u garantuar reagim të menjëhershëm e të paanshëm.