Kryetarja e Bashkisë së Shkodrës, Voltana Ademi i ka bërë thirrje autoriteteve, që në datën 31 maj, në stadiumin Air Albania të lejojnë pjesëmarrjen e 30% të tifozëve.
Në këtë datë pritet përballja Vllaznia-Skënderbeu për finalen e Kupës së Shqipërisë.
Ademi shton se kjo ndeshje vjen pas një sezoni të jashtëzakonshëm, ku Vllaznia rikthehet pas më shumë se një dekade në finalen e Kupës së Shqipërisë, ndërsa shton se përballë kësaj ecurie shumë pozitive mungesa e tifozëve mbetet një nga keqardhjet më të mëdha.
Reagimi i plotë:
Ditën e hënë, datë 31 maj 2021, në stadiumin “Air Albania” ekipi ynë i zemrës Vllaznia, ndeshet përballë Skenderbeut të Korçës në finalen e Kupës së Shqipërisë në futboll.
Kjo ndeshje vjen pas një sezoni të jashtëzakonshëm ku pasi jemi shpallur nënkampion të Shqipërisë, rikthehemi pas më shumë se një dekade në finalen e Kupës së Shqipërisë ndaj një emri të madh të futbollit shqiptar siç është Skenderbeu.
Përballë një ecurie kaq pozitive, sigurisht, mungesa e tifozëve mbetet një nga keqardhjet më të mëdhaja!
Duke parë se tashmë situata e pandemisë globale COVID-19 është çdo ditë e më tepër duke u përmirësuar, duke parë që në të gjitha vendet europiane tashmë finalet e kupave po zhvillohen me pjesëmarrjen e 30% të tifozëve, Bashkia Shkodër i bën kërkesë autoriteteve publike e në mënyrë të veçantë Ministrisë së Shendetësisë dhe Mbrojtjes Sociale:
Ditën e finales, me datë 31 maj 2021, duke respektuar rigorozisht të gjitha protokollet dhe masat anti- Covid, të lejojë prezencën e pjesësemarrjen e tifozëve në 30% të kapacitetit të stadimumit “Air Albania”!