Kandidatja e Partisë Demokratike Albana Vokshi ka denoncuar në KQZ shkelje të Kodit Zgjedhor nga rivalja e saj në PS, Ogerta Manastirliu.
Sipas Vokshit janë dy zyra elektorale që janë hapur pranë qendrave të votimit, ndërkohë që kodi zgjedhor i ndalon ato 300 m larg.
Albana Vokshi ishte tek shkolla “Jeronim de Rada”, ku pak hapa më tej Ogerta Manastirliu ka hapur një zyrë. Kodi zgjedhor e ndalon hapjen e zyrave elektorale deri në 300 metra nga qendrat e votimit. Të njëjtën gjë, Ministrja e Shëndetësisë ka bërë edhe tek Kopshti 3. Pamjet tregojnë se zyra është në cep të kopsjtit, ku janë disa qendra votimi të njësisë 9.
“Është një akt i paligjshëm që synon të intimidojë zgjedhësit ditën e votimit”- thotë Albana Vokshi para zyrës elektorale me qepena të ulur të PS. Kandidatja e PD ka një thirrje për KQZ. “I bëj thirrje KQZ që të mos bëhet palë me PS, por të verifikojë çdo shkelje të ligjit dhe të urdhërojë Policinë Bashkiakë t’i mbyllë këto zyra.”- tha Albana Vokshi, e cila tregon se edhe pas denoncimeve zyrtare të depozituar në KQZ, nuk ka akoma asnjë reagim nga KQZ.