Përveçse si qendra e festimit të karnavaleve në Shqipëri, Shkodra njihet edhe si qyteti i prodhimit të maskave të famshme veneciane, që u japin jetë festave të tilla. Tradita e festimit të karnavaleve në Shkodër daton që në 1860, për t’u ndërprerë gjatë periudhës moniste e për t’u rikthyer pas shembjes së këtij sistemi.
Por duket se ky shkurt do të shënojë rindërprerjen e festimeve të karnavaleve, duke varfëruar edhe më tej jetën artistike të një prej qyteteve që i ka dhënë kaq shumë vendit tonë në kulturë. Kryebashkiakja Voltana Ademi nuk ka marrë asnjë masë për organizimin e festimeve të karnavaleve që ka qenë traditë të festohej çdo fillim shkurti. Burime për tirananews.al bëjnë me dije se Bashkia Shkodër nuk ka ndërmarrë asnjë hap për të mbajtur gjallë edhe këtë vit traditën e bukur.
Shkatërrimi i kësaj tradite të bukur është denoncuar edhe nga aktivistë të shoqërisë civile në Shkodër, të cilët akuzojnë direkt kryebashkiaken Voltana Ademi se po prish traditat e bukura të qytetit. “Znj.Voltana Ademi, ca u ba me festën e Karnavaleve që organizohet në çdo fillim shkurti prej vitesh në Shkodër?! Me ju në drejtim po prishen traditat dhe po shkatrrohet nji qytet.
Znj.Ademi, Shkodra asht e Karnevaleve, e Ditës së Luleve, e Festivalit të Fëmijëve etj, etj, festa që kanë mbajt gjallë kulturën tonë, por ju nuk e dini sepse keni kujtu që Bashkia asht organizatë e jo institucion shërbimesh! (Këtë vit Bashkia Shkodër ka 31 miliardë buxhet, 15 miliard ma shume se vitin e parë të mandatit. Janë mjaftueshëm me rregullu rrugë e me ba aktivitete)”, shprehet Mirsad Basha, drejtues i “EKO Mendje”.
Karnavalet e Shkodrës gjithnjë kanë dhënë një imazh spontan, por të lidhur në mënyrë konkrete me rrënjët historike dhe kulturore të këtij qyteti.