Është vendosur tashmë që Konferenca e Kryetarëve do të mblidhet më datë 4 maj, ora 12:30, ku do të diskutohet për çështjen e zgjedhjes së presidentit të ri. Kjo konferencë mblidhet pas kërkesës së bërë nga kryetari i Grupit të Partisë Socialiste, Taulant Balla.
Ajo do të drejtohet nga Kryetarja e Kuvendit, Lindita Nikolla ndërsa do i përmbahet 2 pikave të rendit të ditës:
- Përcaktimi i procedurës për zgjedhjen e Presidentit të Republikës;
- Përcaktimin e datës së raundit të parë të votimit.
Në tryezë do të ulen kreu i grupit parlamentar socialist Taulant Balla, ai demokrat Enkelejd Alibeaj, së bashku me 2 kryetarët e grupeve të tjera, Fatmir Mediu dhe Mesila Doda. Sipas asaj që ka deklaruar Balla, emri i ri i presidentit do të jetë gati para datës 24 maj.