Detaje të reja janë zbuluar në lidhje me operacionin “Tempulli 3”, i finalizuar një ditë më parë nga Antidroga e Tiranës.
Sipas burimeve, mësohet se ky grup kriminal për të kryer veprimtarinë për shpërndarjen e lëndës narkotike, përdornin një numër celulari që shërbente për të kryer porosi njëlloj si në një call center, i cili shërbente në një dhomë në Laprakë.
Kjo dhomë funksiononte 24 orë me të paktën 3 persona që shërbenin si operatorë. Pas porosisë malli mbërrinte te konsumatori përmes shoferëve të taksive, të cilët i shfrytëzonin ato jo vetëm për transport udhëtarësh, por edhe drogë.
Kokat e grupit dyshohet se janë të arrestuarit në muajin shkurt Fatjon Çiçi dhe Ervis Gorellari, Enea Sulejmani, Shkëlqim Osteni dhe Igli Begaj.
Në mesin e të arrestuarve gjatë operacionit të së enjtes janë të paktën 3 taksistë. Ndërkohë, përveç porosive që bëheshin përmes numrit celular, anëtarët e grupit komunikonin mes tyre përmes aplikacionit Signal.
Për të ruajtur drogën, ky grup përdorte kryesisht banesa të marra me qira.