Lulzim Basha ka një problem krize legjitimiteti brenda partisë së tij që prej 11 dhjetorit kur Kuvendi i thirrur nga Berisha pretendon se e shkarkoi me shumicë të votës së delegatëve. Burime për Report Tv nga Qeveria bëjnë me dije se mazhoranca ka një strategji të re me sjelljen ndaj kryeopozitarit. Duke filluar nga sot replikat me Lulzim Bashën i janë deleguar ministres Elisa Spiropali.
Edi Rama ishte sot në Kuvend njësoj si gjithë ditët e tjera. Pasi Kryeministri përfundoi fjalën e tij, Kryetarja e Kuvendit ia dha fjalën Lulzim Bashës, i cili shfrytëzoi rastin për replikën e radhës. Por ndryshe nga herët e tjera, Kryeministri nuk replikoi pas përfundimit të fjalës së Bashës, duke ia lënë të drejtën e replikës Ministres se Shtetit për Marrëdhënien me Parlamentin Elisa Spiropali.
Spiropali e ka replikuar me kryetarin e opozitës Lulzim Basha, duke iu drejtuar se e ka humbur mundësinë dhe privilegjin për replikë nga ana e shumicës, pasi vetë PD është në kushtet e humbjes së legjitimitetit.
Ajo i tha se “E keni futur opozitën në vallen e marrëzisë. Në kushtet e humbjes së legjitimitetit të të gjithë PD-së dhe kacafytjes mes dy hijeve, ju Basha e keni humbur mundësinë e një replike nga kjo shumicë”.