Presidenti i Francës, Emmanual Macron duket se fitoren e tij në mandatin e dytë presidencial, nuk do ta shijojë, kjo pasi ka humbur kontrollin e Parlamentit të Francës. Koalicioni i tij i qendrës ka humbur dhjetëra ulëse në zgjedhjet që kanë shpërfaqur ndasi të konsiderueshme në politikën franceze. Kryeministrja franceze, Elisabeth Borne, ka thënë se situata është e pashembullt. Sipas saj, Franca moderne nuk ka pasur kurrë një përbërje të tillë parlamentare.
“Kjo situatë përbën rrezik për shtetin tonë, duke marrë parasysh rreziqet me të cilat jemi duke u përballur si në aspektin kombëtar, ashtu edhe në atë ndërkombëtar. Ne do të punojmë prej nesër për të krijuar një shumicë funksionale”, ka deklaruar Borne, ndonëse dy grupet e tjera më të mëdha në Parlament nuk duken të interesuara për të bashkëpunuar.
Kampi qendror i Macronit ka fituar 245 ulëse, në krahasim me 289 që i janë dashur për të krijuar një shumicë absolute. Pas sigurimit të mandatit të dytë si president, në prill të këtij viti, ai ka shpresuar për përkrahje më të madhe parlamentare. Në vendin e dytë është renditur blloku Nupes, i krahut të majtë, i cili ka fituar 131 ulëse.