Deputetja e Partisë Demokratike, Ina Zhupa, kërkoi interpelancë me ministren e Kulturës duke iu referuar çështjes së Butrintit, me të cilën u mor gjatë edhe në sesionin e kaluar parlamentar. Por kryeministri Edi Rama e ironizoi, duke i thënë: “Je fushë komplet, do bësh karrierë si kryetari”.
Deputetja Zhupa këmbëngul se menaxhimi i Butrintit nuk mund t’i lihet në dorë një personi që me qasjen që ka, mund të rrezikojë interpretimi i gjetjeve. Ajo e akuzoi ministren e Kulturës se e ka përzgjedhur Hodges-in ndër 6 kandidatë vetëm prej njohjes së këtij të fundit me kryeministrin Rama, i cili e ka pasur këshilltar kur ka qenë ministër Kulture.
“Do të kisha dashur që të ishin këtu duke kryer interpelancës, do ishte mirë që dhe zonja ministre të ishte këtu dhe të thoshte arsyet arsyet pse ka vendosur në bordin e menaxhimit të Butrintit, Richard Hodges. Së fundmi kanë dalë video të tij teksa shprehet dhe flet për shqiptarët. Nëse mundeni dëgjojeni. Sipas Hodges, territore të Shqipërisë duhet të jenë të Greqisë. Ai thotë se miti i shqiptarëve është shpikur nga Enver Hoxha. Shqipëria dhe arkeologët meritojnë më shumë respekt dhe dinjitet. A është i denjë të përfaqësojë shtetin në Bordin e Butrintit? Deklaratat publike kanë dalë shumë më vonë. Të nderuar deputetë, jeni shqiptarë dhe si të tillë duhet që tërhiqeni nga vendimi“”.
Deputetja demokrate është një ndër zërat më kritik të opozitës, sa i përket marrëveshjes për menaxhimin e Butrintit, thotë se kjo marrëveshje nuk është në interes të publikut.