Pengesa e zgjerimit të Bashkimit Europian me vende të reja është se vendet anëtare kanë të drejtën e vetos, dhe për Josep Borrell kjo mënyrë duhet të marrë fund. Përfaqësuesi i Lartë i Bashkimit Europian për Punë të Jashtme dhe Politikë të Sigurisë, njëherazi zëvendës president i Komisionit Europian, thotë se vendimmarrja me unanimet në BE (vendosja e vetos) duhet ndryshuar. Sipas tij kështu po cenohet rëndë besueshmëria e Bashkimit Europian.
Këshilli Europian dështoi që të bënte Bullgarinë të hiqte veton ndaj Maqedonisë së Veriut, që penalizoi edhe Shqipërinë. Menjëherë pas këtij vendimi ishte kryeministri Edi Rama që kërkoi të ndryshojë mënyra se si BE merrte vendimet.
“Gjatë viteve, ne kemi parë shumë raste kur shtetet anëtare ishin të ndara për çështje të politikës së jashtme. Dhe në parim është normale që ne kemi pikëpamje të ndryshme për të filluar, duke pasur parasysh dallimet tona në histori, gjeografi dhe kulturë strategjike politike. Por ajo që ka rëndësi në jetën politike nuk është se si nis një diskutim, por si përfundon ai.
Fuqia e sistemit të BE-së ka qenë gjithmonë që disi t’i kthejë ndarjet në marrëveshje. Këtu ka shumë rëndësi nëse një vendim merret me unanimitet apo me shumicë të cilësuar votash. Nëse vendet e dinë paraprakisht se vendimi përfundimtar mund të merret me shumicë votash të cilësuar, ato kanë një nxitje të fortë për të negociuar dhe për të formësuar konsensusin. Nëse ata e dinë se mund të bllokojnë gjithçka, nuk kanë një nxitje për të investuar në një kompromis të shëndetshëm.
Ne kemi parë dinamikë të ngjashme në hapjen e negociatave të anëtarësimit me Maqedoninë e Veriut dhe Shqipërinë, me një vend që bllokon atë që të gjithë të tjerët mund të bien dakord përsëri me pasoja negative për besueshmërinë dhe ndikimin e BE-së”.