Avokati i Arsen Muskurtit foli për mediat sapo u dha masa e sigurisë “arrest me burg” për klientin e tij, duke thënë se autori nuk u arrestua nga policia, por u vetëdorëzua në komisariat. Sipas tij, Arseni ka qenë në gjendje të rënduar psikologjike. Po ashtu avokati informoi se Arseni (Hamza) Muskurti ka bërë 7 kallëzime penale ndaj viktimave por pretendon se Policia e Shtetit nuk ka marrë masa.
Nga ana tjetër, avokati kërkon të hedhë poshtë deklaratën e ministrit të Brendshëm Bledi Çuçi, i cili tha se autori u prangos vetëm pak orë pas ngjarjes nga policia dhe forcat RENEA.
“Është dorëzuar vetë, kam parë shumë trillime nga mediat. Më ka dërguar mua personalisht që ta dorëzoj, kemi shkuar vetë në ambientet e komisariatit që ta bëjmë dorëzimin. Ka qenë në gjendje shumë të rënduar psikologjike. Merrte dhe mjekime. Ai ka kryer 7 kallëzime penale ndaj të ndjerit dhe së ndjerës, ndërsa Policia e Shtetit nuk ka marrë asnjë masë. Kallëzimet janë sekret hetimor, nuk mund t’i nxjerrim. Por nuk është arratisur, jua bëj me dije. Që në vitin 2018, ka pasur probleme e merrte mjekime. Armën e ka pasur me leje dhe kemi paraqitur çdo lloj dokumentacioni të nevojshëm”, tha avokati.