Një sasi e madhe kanabisi është sekuestruar mesditën e sotme në hyrje të qytetit të Lezhës, në dalje të autostradës së Laçit. Policia e Lezhës kishte ngritur një postbllok në këtë zonë pas informacioneve se këtë mesditë do të kryhej një transport lëndësh narkotike, në mënyrë që tu bënte pritë trafikantëve.
Sapo kanë kaluar autostradën dhe po futeshin në Lezhë, mjeti është ndaluar nga policia, por personat që ndodheshin brenda saj kanë zbritur dhe kanë tentuar të largohen. Për t’i ndaluar, efektivët kanë qëlluar me armë zjarri në ajër dhe trafikantët kanë ndaluar. Ata janë prangosur dhe janë dërguar në komisariat për tu marrë në pyetje në lidhje me drogën që po transportonn, sasia e të cilës nuk dihet ende me saktësi, por që është sekuestruar.
Nga ana e policisë nuk ka ende një informacion zyrtar në lidhje me ngjarjen. Pritet që në vijim të zbardhen identitetet e personave të përfshirë, të prangosur dhe të atyre që prisnin të merrnin ‘mallin’ që u sekuestrua sot.