Dukesha e Cambridge, Kate Middleton, ka mbajtur premtimin që i kishte dhënë një vajze të vogël, e cila kishte kërkuar të takonte princeshën të veshur me një fustan ngjyrë rozë. Kate ftoi vogëlushen Mila Sneddon dhe familjen e saj në Pallatin Mbretëror dhe veshi një fustan të ngjashëm me atë të vajzës 5-vjeçare.
Në fakt Mila i është nënshtruar një kimioterapie për shkak të sëmundjes së leucemisë, ndaj Kate vendosi t’i plotësonte dëshirën. Ajo ka komunikuar më herët me dukeshën përmes celularit, pasi fotografia e saj u përzgjodh për një ekspozitë.
Mila u fotografua gjatë pandemisë duke puthur dritaren e kuzhinës, teksa babai i saj qëndronte jashtë shtëpisë së tyre dhe ky imazh u kthye në simbolin e izolimit.
“Përshëndetje Mila, shikoje veten. Dua të të jap një përqafim të madh, është kaq bukur të të takoj ty personalisht”, u shpreh Dukesha Kate gjatë takimit me të voglën.
“Më pëlqen shumë fustani yt dhe këpucët”, shtoi Kate Middleton, duke i dhuruar shumë lumturi të voglës.
Ndërkohë vogëlushja u shpreh e lumtur pas takimit me Kate Middleton, duke qenë se kjo ishte hera e parë që takonte një princeshë në jetën reale. “Ishte shumë bukur, nuk kam takuar kurrë një princeshë të vërtetë në jetën time më parë”, tha Mila, teksa shtoi se i pëlqeu shumë fustani rozë i Kate.
