Kryeministri Albin Kurti ka njoftuar se nga 1 tetori do të hiqen të gjitha pagesat për studentët e Bachelorit dhe Masterit, në të gjitha universitet publike në Kosovë.
Sipas mediave vendase ky vendim do të përfshijë për studentët e vitit akademik 2021/2022. Ndërsa, Kurti është shprehur se do të ketë lehtësime edhe për studentët e Doktoraturës.
“Nga një tetori i këtij viti duke filluar nga viti akademik 2021/2022, arsimi i lartë në Kosovë do të jetë pa pagesë për të gjithë ata që dëshirojnë të studiojnë për nivelin Bachelor dhe Master ndërsa ata të Doktoratës do të kenë lehtësime”, ka thënë Kurti.
Ndërkohë, Kurti ka bërë me dije se nga ky vendim do ët përfitojnë edhe studentët e rajonit që studiojnë në Kosovë.
“Besojmë që në këtë formë nxisim interesimin për studime të larta duke përmirësuar nivelin e përgjithshëm arsimor të popullsisë sonë dhe duke kontribuar në zhvillimin e kapitalit njerëzor që është parakusht për zhvillim ekonomik e progres shoqëror. Nga ky vendim do të përfitojnë të gjitha kategoritë e shoqërisë. Do të përfitojnë edhe studentët e vendeve të tjera e sidomos të atyre të rajonit që do të trajtohen si të gjithë studentët e tjerë”, u shpreh Kurti.