Lura njihet për mrekullitë e saj, sidomos për liqenet mahnitës. Lura është një zonë e thellë në rrethin e Dibrës. Dimri cdo vit është i ashpër. Banorët e këtushëm janë përshtatur me klimën, borën, me izolimin disaditor.
Prej një jave fshatrat e Lurës janë të izoluar për shkak të dëborës. Lartësia e saj është mbi 70 cm. Lurjanët kanë siguruar rezerva dimërore për njerëzit dhe kafshët që mbarështrojnë.
Administratori Hasan Hoti tha se Lura është larg Peshkopisë dhe Mirditës. Mbërritja e mjeteve borëpastruese nuk ka qenë e lehtë. Është dashur që fadromat e bashkisë Dibër të pastrojnë dhjetra kilometra rrugë për të mbërritur në Lurë. “Sot filluam pastrimin e rrugëve, shprehet Hoti. Për fat të mirë nuk kemi patur emergjenca shëndetësore. Nuk kemi informacione as për mungesë ushqimesh. Në se do të kemi probleme do të kërkojmë ndihmën e Emergjencave Civile”, tha ai.
Për shkak të bllokimit të akseve Kurbnesh-Lurë dhe Peshkopi-Lurë turistët vendas apo të huaj e kanë patur të pamundur të shijojnë bukuritë e Lurës magjike.
