Policia ka reaguar lidhur me pamjet e postuara në rrjetet sociale ku nipi i deputetit socialist dhunon një femër në mes të rrugës.
Policia thotë se ngjarja ka ndodhur më 31 korrik rreth orës 07.30 minuta, në oborrin e spitalit “Nënë Tereza” dhe se ndaj 26-vjeçarit Ramazan Rraja ka nisur thjesht një procedim penal, duke ia referuar prokurorisë për veprime të mëtejshme.
Ndërkaq, bëhet me dije se është pezulluar edhe policja që në pamje shfaqet duke mos bërë asgjë ndërkohë që kanë nisur verifikimet për veprimet apo mosveprimet e saj.
Lexo edhe- Emër i njohur, kush është i riu që dhunoi një vajzë në mes të ditës
DEKLARATA E POLICISE
Lidhur me videon e publikuar në mediat sociale, ku një i ri shfaqet me pamje duke dhunuar një femër në oborrin e spitalit “Nënë Tereza”, Tiranë, në interes të opinionit publik informojmë se:
Ngjarja në fjalë ka ndodhur në datë 31.07.2019, rreth orës 07:30 minuta.
Shërbimet policore kanë shoqëruar në Komisariat shtetasin R.Rr. 26 vjeç dhe e kanë proceduar penalisht. Materialet në ngarkim të këtij shtetasi janë referuar në Prokurori për veprime të mëtejshme.
Gjithashtu, Drejtoria e Standardeve Profesionale në Policinë e Shtetit, pas pezullimit nga detyra të punonjëses së Policisë që ishte pranë vendit të ngjarjes, ka nisur verifikimet për veprimet apo mos veprimet e saj.
