Tashmë dihet që sulmi rus në Ukrainë ka sjellë shumë pasoja dhe një nga fushat që është prekur jashtë mase shumë është edhe bota e sportit, për më tepër ajo e futbollit. Një demonstrim për këtë fakt vjen nga lojtarët brazilianë të ekipit të Shaktharit të cilët kanë postuar një mesazh prekës në rrjetet e tyre sociale.
Ata janë të gjithë bashkë me familjet e tyre, të mbledhur në një hotel në Kiev dhe nuk mund të largohen. Kujtojmë se të gjitha aeroportet në Ukraine janë mbyllur dhe çdo fluturim është anulluar.
“Situata është dëshpëruese. Unë dua që ju ta shpërndani këtë video, që të mund të arrijë drejt qeverisë braziliane. Ne jemi mbledhur të gjithë bashkë për të pritur për një plan për të larguar Ukrainën”, ishin fjalët e thëna nga lojtarët brazilian, që janë të shumtë në ekipin e Shakhtarit.
Një mesazh i trishtë nuk ka munguar as nga braziliani Zhunior Moraesh, i cili shkruan: Të gjithë shokët dhe familjarë, situata është serioze dhe ne kemi ngecur në Kiev, duke pritur për një zgjidhje si të largohemi. Ne jemi brenda një hoteli. Lutuni për ne”.