Një 18-vjeçare me origjinë marokene u sulmua me armë zjarri mbrëmjen e të mërkurës nga bashkëshorti i saj shqiptar, por fatmirësisht ndodhet jashtë rrezikut për jetën.
Autori është identifikuar si Oltjon Sallaku, 21 vjeç, i cili vrau veten menjëherë pasi qëlloi gruan e tij.
Ngjarja ndodhi në rrugën Martin Luther King në Cassano delle Murge, pas një debati të ashpër mes çiftit. Në çastin kur janë dëgjuar të shtënat, në banesë ishte vajza 2-vjeçare e çiftit, si dhe mamaja e 18-vjeçares.
21-vjeçari shqiptar punonte si shtrues pllakash në Bari, ku të gjithë e njihnin si djalë të qetë, por ende nuk dihet përse ai mbante armë në shtëpi.
Lidhur me këtë ngjarje ka reaguar edhe kryebashkiaku i zonës, i cili ka shprehur se hetimet ende vijojnë dhe se komuniteti Cassano është i tronditur nga ngjarja.