Policia turke ka vënë në pranga një shqiptar, i cili ishte duke transportuar 1.5 ton drogë me kamion. Sipas “Anadolu Agency”, autoritetet zbuluan hashashin në mjet të fshehur, në pikën kufitare të Ipsala-s në krahinën verilindore Edirne.
Shoferi i mjetit ishte me origjinë shqiptare, ndërkohë që ai së bashku me dy persona të tjerë u arrestuan nga autoritetet turke. Gjatë kërkimeve të detajuara, punonjësit e policisë zbuluan drogën që ishte e fshehur në 152 thasë, secila prej tyre mbante nga 10 kilogramë. Droga ishte fshehur midis thasëve të mbushur me sojë. Sipas policisë turke, ky është sekuestrimi më i madh i drogës që Turqia ka bërë në një operacion të vetëm në pikat doganore.