Policia e Shtetit u bën apel qytetarëve që të respektojnë rregullat e qarkullimit rrugor. Në një njoftim, Policia fokusohet kryesisht te ata që bëjnë parakalime të gabuara duke shmangur radhën e qarkullimit të automjeteve e duke u bërë burim aksidenti.
“Ky drejtues mjeti me një kurajo dhe prepotencë të dukshme qarkullon në sens të kundërt në rrugë. Për sjelljen e tij telefonuan Policinë dhe dërguan njoftim edhe në aplikacionin “Komisariati Dixhital” shumë drejtues mjetesh dhe qytetarë të fyer nga veprimi i tij. Policia Rrugore ka mbërritur menjëherë në adresën e dhënë dhe e ka detyruar drejtuesin e mjetit të qarkullojë pas, me qëllim që kolona e rregullt e mjeteve, të shikonte “trimërinë” e tij” njofton Policia.
Si pasojë e kësaj shkeljeje merret masa administrative plotësuese e pezullimit të lejes së drejtimit nga 2 deri në 6 muaj.
“Shpresojmë që ky drejtues mjeti dhe “të ngjashmit” me të, të mos e bëjnë herën tjetër”. Publikimi i këtij rasti bëhet në respekt të qytetarëve që denoncuan dhe në kuadër të sensibilizimit për respektim të rregullave të qarkullimit rrugor nga drejtuesit e mjeteve dhe nga këmbësorët. Jeta është e shtrenjtë, mbroje atë, qarkullo me rrip sigurimi, vendos kaskën mbrojtëse, rripin e sigurimit dhe mos harro shpejtësinë brenda limiteve të lejuara” shkruhet në njoftimin e Policisë.S
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.