Vllaznia pësoi një humbje të rëndë në transfertë përballë Laçit, një humbje që nuk u prit mirë as nga trajneri Brdaric e as nga presidenti Alban Xhaferi. Ky i fundit, ndryshe nga çdo herë tjetër, nuk u tregua diplomat, e as nuk është fshehur por ia ka faturuar drejt për drejt këtë disfatë gjyqtarit Hamiti, duke e bërë atë përgjegjës, mbi të gjitha për golin që i anuloi në pjesën e parë.
“Një fitore e mohuar, Eldorian Hamiti turp”, shkruan ndër të tjera presidenti Xhaferi. Kjo disfatë praktikisht i nxjerr nga gara për titullin klubin shkodran, pasi diferenca me Tiranën shkon në 13 pikë, por ky fakt nuk e demoralizon Xhaferin, numri një i klubit kuqeblu vijon të besojë: “Edhe 17 ndeshje, nuk dorëzohemi”, shkruan Xhaferi në profilin e tij në “Facebook”.
Pavarësisht fjalëve të Xhaferit situata tek Vllaznia bëhet gjithnjë e më e vështirë, kalendari në dy javët e ardhshme i rezervon rivalë si Teuta e Partizani ndërsa trajneri Brdaric e ka shumë të vështirë të gjejë një zgjidhje fituese, ekipi i tij edhe ndaj Laçit prodhoi shumë futboll por nuk ishin të qartë në finalizim.