Makina e tij u dogj mëngjesin e sotëm, teksa ishte e parkuar dhe policia ka nisur hetimet për zbardhjen e ngjarjes. Por kush është ish inspektori, në pronësi të të cilës ishte mjeti?
Lexo edhe- I djegin makinën efektivit të Elbasanit, policia jep detajet
Sipas “Panorama” bëhet fjalë për Edvin Gjylin, ish inspektor i krimeve të Rënda në policinë e Elbasanit. Ai u pezullua nga detyra bashkë me tre efektivë të tjerë pasi nxori sekretin hetimor të zbulimit të arsenalit të armëve në Papër të Elbasanit.
Një ditë pas zgjedhjeve lokale, që korrespondonte edhe me një atentat me armë zjarri ndaj dy vëllezërve në Elbasan, njëri prej të cilëve mbeti i vrarë, Policia zhvilloi një operacion, duke zbuluar një arsenal armësh.
Lexo edhe- Dyshohen se nxorën sekretin hetimor për arsenalin e armëve në Elbasan, pezullohen oficerët
Pasi lajmi u publikua në media, nisi ecuria disiplinore për 4 oficerë. Arsyetimi: Kanë dekonspiruar operacionin. Çështja nuk mbeti vetëm me kaq, pasi pas kesaj Ministria e Brendshme njoftoi se SHÇBA ka ekzekutuar vendimin e Gjykatës së Elbasanit, që kishte caktuar masat “Pezullim të ushtrimit të detyrës” për 4 punonjës Policie në nivel drejtues.
Konkretisht, Gjykata ka marrë këtë vendim për Bilal Semanajn, shef i Komisariatit të Cërrikut, Albion Xhitozin, shef i Krimeve në Komisariatin e Cërrikut, Edvin Gjylin, specialist për Hetimin e Krimeve në Komisariatin e Elbasanit dhe Eduart Hasanin, specialist për Hetimin e Krimeve në Komisariatin e Elbasanit.