28 vjeçari është parë për herë të fundit në datën 1 nëntor në Ersekë ku ka konsumuar kafen me shokët e tij.
Një telefonatë për vendndodhjen e Sherif Mukajt është kryer ditën e sotme nga një person. Ky i fundit ka bërë të ditur se ka parë në një lokal një të ri që besonte se ishte 28-vjeçari i zhdukur 19 ditë më parë. Policia e Kolonjës në bashkpunim me atë të Shkodrës kanë kërkuar së bashku me familjarët e të riut. Sipas familjarëve, nga kamerat e sigurisë së lokalit ku mendohet të jetë parë djali rezulton se nuk ishte i njëjti person me atë që përshkruante telefonata.
Policia ka sekuestruar sendet e tij personale bashkë me celularin që po i nënshtrohet një ekspertize për të zbuluar personat e fundit me të cilët ka kontaktuar 28-vjeçari. Nuk dihet ende se çfarë mund t’i ketë ndodhur Mukajt, nëse ai ka pasur konflikte me ndonjë person apo mund të jetë rrëmbyer.
Familja e të riut ka ardhur nga Shtetet e Bashkuara të Amerikës drejt Shqipërisë për të kërkuar djalin e tyre. Ata kanë treguar se për herë të fundit, i riu është parë në fshatin Starje. Kërkimet për gjetjen e tij ende janë në vijim.