Vrasësit e Behar Sofisë do të kryenin dhe një tjetër atentat. Fakti ka dalë nga dëshmitë e të akuzuarit si ekzekutor , i cilët para policisë ka zbardhur të gjithë ngjarjen.
Grupi i vrasësve me pagesë të Behar Sofisë, sipas dosjes hetimore dyshohet se kishte marrë edhe një tjetër porosi për krim.
Kjo është pohuar nga dëshmia e 23 vjeçarit Ernejt Shyti, i cili ka pranuar autorësinë e vrasjes, si dhe ka treguar edhe gjithë përgatitjet për krimin, që u krye në 25 shkurt, si dhe rolin e personave të arrestuar.
23-vjeçari Ernejt Shyti në dëshmi, ka thënë se i arrestuari Leonard Xhixha, i ka pohuar gjatë takimeve se kishte edhe një punë tjetër për të bërë.
Kjo deklaratë ngre dyshimet se grupi do të kryente një tjetër vrasje me pagesë, por kjo çështje eshtë ende duke u hetuar.
Ekzekutori ka pohuar se me Xhuliano Vishën kishte njohje te vjetra, dhe se ai i kishte propozuar kryerjen e vrasjes, duke qënë se ai vetë nuk e bënte dot, pasi ishte pikasur nga roja e pallatit te ETC. Xhuliano i kishte siguruar armën me silensiator, biçikletën dhe telefonin.
Shyti ka treguar se Xhuliano e kishte prezantuar edhe me dy personat e tjerë Leonard Xhixhen, i cili ka vëzhguar viktimën dhe ka dërguar Shytit nëpërmjet telefonit foton e tij.
Me këtë person Shyti thotë se ishte takuar disa here edhe fizikisht dhe gjatë takimeve me të ai ka njohur edhe një tjeter person, i cili nga paraqitja për njohje rezulton është Skënder Vathi, që i thërrisnin ndryshe “Dajo”.
23 vjeçari thotë se, Vathi, i cili ka bërë ruajtjen e viktimës poshtë pallatit ka qenë edhe personi që e ka instruktuar disa here për të kryer vrasjen. Por si Vathi ashtu edhe Xhixha nuk i janë prezantuar 23-vjeçarit me emrat e vërtetë, ata janë identifikuar nga vete ai pasi i është bërë paraqitja për njohje ne Drejtorinë e Policisë së Tiranës.